पाचगणीत महिलांसाठी ‘हळदीकुंकू व खेळ पैठणी’चा बहारदार सोहळा; उद्या नचिकेताजमध्ये रंगणार उत्सव बातमी :
गिरीस्थान टाईम्स वृत्तसेवा पाचगणी : पाचगणी शहरातील महिलांच्या सुप्त कलागुणांना वाव देण्यासाठी तसेच भारतीय पारंपरिक संस्कृतीचा वारसा जपण्यासाठी उद्या, गुरुवार दि. १६ जानेवारी रोजी सायंकाळी ४ वाजता नचिकेताज हायस्कूल आणि ज्युनिअर कॉलेज, पाचगणी येथे ‘हळदीकुंकू व खेळ पैठणी’ या विशेष कार्यक्रमाचे आयोजन करण्यात आले आहे. युवा नेते व सामाजिक कार्यकर्ते अमर बिरामणे यांच्या संकल्पनेतून व पुढाकारातून हा बहारदार सोहळा साकारत असून, या उपक्रमाला नगरसेवक नरेंद्र बिरामणे आणि नगरसेविका सुप्रिया महेश माने यांचे मोलाचे सहकार्य व मार्गदर्शन लाभले आहे.
सामाजिक क्षेत्रात सक्रिय असलेल्या या नेतृत्वाच्या मार्गदर्शनाखाली महिलांना केवळ मनोरंजनच नव्हे, तर आपुलकीचा आणि सन्मानाचा हक्काचा विरंगुळा मिळावा, हा मुख्य उद्देश आयोजकांनी ठेवला आहे. अमर बिरामणे यांनी या उपक्रमाच्या माध्यमातून महिलांच्या सन्मानासाठी आणि सहभागासाठी एक भक्कम व्यासपीठ उपलब्ध करून दिले असल्याचे बोलले जात आहे.
कार्यक्रमाची सुरुवात पारंपरिक हळदीकुंकू समारंभाने होणार असून, त्यानंतर महिलांमध्ये अत्यंत लोकप्रिय असलेल्या ‘खेळ पैठणी’ या स्पर्धेचा थरार रंगणार आहे. या स्पर्धेसाठी विविध मनोरंजक फेऱ्यांचे आयोजन करण्यात आले असून, सहभागी महिलांमध्ये उत्साह आणि चुरस पाहायला मिळणार आहे.
स्पर्धेतील विजेत्या भाग्यवान महिलांना मानाची पैठणी व आकर्षक बक्षिसे देऊन सन्मानित करण्यात येणार आहे. विशेष म्हणजे, कार्यक्रमास उपस्थित राहणाऱ्या प्रत्येक महिलेसाठी खास भेटवस्तू देण्याची व्यवस्था आयोजकांच्या वतीने करण्यात आली आहे. त्यामुळे महिला वर्गामध्ये या कार्यक्रमाबाबत मोठा उत्साह निर्माण झाला आहे.
नगरसेवक नरेंद्र बिरामणे व नगरसेविका सुप्रिया महेश माने यांच्या मार्गदर्शनाखाली कार्यक्रमस्थळी आकर्षक सजावट व जय्यत तयारी करण्यात आली असून, पाचगणी शहरातील विविध भागांतील महिलांनी या सोहळ्यासाठी आपला सहभाग निश्चित केला आहे. हा कार्यक्रम एक आनंददायी, उत्साही व कौटुंबिक उत्सव म्हणून मोठ्या उत्साहात पार पडेल, असा विश्वास आयोजकांनी व्यक्त केला आहे.