“संस्कृती आणि शिक्षणाची सुंदर सांगड” – म्हणजे प्रतिभेचा जागर : स्वप्नील परदेशी, स्कॉलर्स फाऊंडेशनचा सांस्कृतिक कार्यक्रम : नवनिर्वाचित नगरसेवक प्रसाद कारंजकर यांची विशेष उपस्थिती.
गिरीस्थान टाईम्स वृत्तसेवा पाचगणी : शालेय जीवनातील वार्षिक सांस्कृतिक कार्यक्रम हे विद्यार्थ्यांच्या अंगी दडलेल्या सुप्त गुणांना व्यक्त होण्यासाठी हक्काचे व्यासपीठ ठरतात. अशा कार्यक्रमांतून संस्कृती आणि शिक्षणाची सुंदर सांगड घालण्याचे महत्त्वाचे कार्य घडते, असे गौरवोद्गार पाचगणी येथील धनंजय फूड्सचे मालक व संचालक श्री. स्वप्नील परदेशी यांनी काढले.
ते खिंगर (पाचगणी) येथील स्कॉलर्स फाउंडेशन हायस्कूलच्या “विविधा – एक सांस्कृतिक ओडिसी” या वार्षिक विविधता कार्यक्रमप्रसंगी बोलत होते. यावेळी पाचगणी नगरपरिषदेचे नवनिर्वाचित नगरसेवक श्री. प्रसाद करंजकर, याची विशेष उपस्थिती होती. स्कॉलर्स फाउंडेशनच्या अध्यक्षा श्रीमती सेलिन वायापुली, उपाध्यक्ष श्री. सनी पॉल, मुख्याध्यापिका श्रीमती किरण राजपुरे, व्यवस्थापकीय संचालिका श्रीमती रवीना सनी आदी मान्यवर उपस्थित होते.
प्रमुख पाहुण्यांच्या हस्ते दीपप्रज्वलन करून कार्यक्रमाची विधिवत सुरुवात करण्यात आली. त्यानंतर विद्यार्थ्यांच्या सांस्कृतिक सादरीकरणांनी रंगमंच गाजवला. “विविधा – एक सांस्कृतिक ओडिसी” या संकल्पनेतून भारताच्या समृद्ध सांस्कृतिक वारशाचे आणि विविधतेतील एकतेचे प्रभावी दर्शन घडवण्यात आले. रंगीत पोशाख, सुसंवादी संगीत आणि शिस्तबद्ध सादरीकरणामुळे प्रेक्षक मंत्रमुग्ध झाले.
हा भव्य कार्यक्रम विद्यार्थ्यांच्या कठोर परिश्रम, शिस्त आणि सर्जनशीलतेचे फलित ठरला. वर्गशिक्षक, नृत्य शिक्षक तसेच विशेषतः श्री. पवन यांच्या कुशल मार्गदर्शनामुळे प्रत्येक सादरीकरणात भव्यता, ऊर्जा आणि परिपूर्णता दिसून आली. कार्यक्रमाची सुरळीत अंमलबजावणी उपप्राचार्य श्रीमती अनुप्रिता कांबळे यांनी केली, तर व्यवस्थापकीय संचालिका श्रीमती रवीना सनी यांच्या मार्गदर्शनामुळे कार्यक्रम अधिक संस्मरणीय ठरला.
कार्यक्रमाचे विशेष आकर्षण म्हणजे शाळेतील सहाय्यक कर्मचाऱ्यांचा सत्कार. शाळेचे स्वच्छ, निरोगी व पोषक वातावरण राखण्यात मोलाची भूमिका बजावणाऱ्या काकू व इतर कर्मचाऱ्यांचा सन्मान करण्यात आला. त्यांच्या अमूल्य योगदानाची दखल घेत उपस्थितांनी त्यांना भरभरून दाद दिली.
सांस्कृतिक कार्यक्रमांत बंगाल, कर्नाटक, आंध्र प्रदेश, महाराष्ट्र, पंजाब, आसाम आदी विविध राज्यांतील पारंपरिक नृत्ये सादर करण्यात आली. प्रत्येक नृत्यात त्या-त्या राज्यांची संस्कृती, परंपरा, पोशाख व भावना प्रभावीपणे मांडण्यात आल्या, ज्यामुळे प्रेक्षकांना नृत्य व संगीताच्या माध्यमातून भारतभ्रमणाचा अनुभव मिळाला.
एकूणच, स्कॉलर्स फाउंडेशन हायस्कूलचा वार्षिक विविधता कार्यक्रम अत्यंत यशस्वी ठरला. विद्यार्थ्यांची प्रतिभा, संघभावना आणि सांस्कृतिक जाण यांचा सुंदर संगम या कार्यक्रमातून दिसून आला. जोरदार टाळ्यांच्या गजरात संपलेला हा कार्यक्रम विद्यार्थ्यांमध्ये आत्मविश्वास, सांस्कृतिक जाणीव आणि राष्ट्रीय एकतेचा संदेश देऊन गेला.